Le forum de Kairouan

منتدى القيروان
 
AccueilAccueil  CalendrierCalendrier  GalerieGalerie  FAQFAQ  RechercherRechercher  S'enregistrerS'enregistrer  MembresMembres  GroupesGroupes  Connexion  
السيد عبد المجيد لغوان الوالي الجديد لولاية القيروان
نبيل الضيف يعود إلى ممارسة مهامه على راس النيابة الخصوية في انتظار صدور القائمة الجديدة ويبادر بإزالة بناءتين فوضويتين أحداها بالحي التجاري 1 والثانية بطريق حفوز

Partagez | 
 

 Autoroute, voie ferrée et technopole...Y a-t-il des solution

Voir le sujet précédent Voir le sujet suivant Aller en bas 
AuteurMessage
wadja79



Nombre de messages : 814
Age : 38
Localisation : La Marsa
Humeur : hamdoullah
Loisirs : Lecture, Sport
Date d'inscription : 02/09/2009

MessageSujet: Autoroute, voie ferrée et technopole...Y a-t-il des solution   Jeu 11 Nov - 15:12

السلام عليكم،

توة مدة نقرا في الكا.سي.بي و نسمع في الناس تحكي على الأوتوروت : هاو باش يجي..لا مازال موش باش يجي. و الناس تحكي على السكة الحديدية: هاو باش يرجعو الخط القديم...لا، باش يعملو خط جديد. و على القطب التكنولوجي: الناس تحبّ عنا قطب تكنولوجي كيما في سوسة و المنستير و يقولوا: شبيهم هوما عندهم زوز أقطاب تكنولوجية في مسافة 20 كم و إحنا ما عنا شيء؟

باهي، نستسمحكم باش نعطي رأيي في الحكاية (و ينجم يكون رأيي غالط). أول حاجة يلزمنا نخليو المشاعر على جنب و ننساو إلي إحنا نحبو القيروان و نحطّو رواحنا في بقعة الناس إلي تاخذ في القرار.

هات نبداو بالأوتوروت. أول حاجة الأوتوروت هاذي وقع الإعلان عنها منذ 2006. و بكل صراحة مانيش فاهم علاه المجلس الجهوي انعقد آخر مرة باش يحكي على القرار الأخير. الحكاية وقع الإعلان عنها منذ 4 سنوات و لا جديد يذكر منذ ذلك الوقت. و بكل صراحة، و حسب رأيي الشخصي، ما زلنا باش نستناو سنوات و سنوات أخرى قبل ما نراوها الأوتوروت هاذي في القيروان. و فما زوز أسباب

السبب الأول: غياب تام للضغط من طرف المسؤولين الجهويين من أجل إحداث هذا المشروع.

السبب الثاني: و هو الأهم. المردودية الضعيفة متاع المشروع هذا مقارنة بأوتوروت تونس الحمامات أو الحمامات صفاقس أو صفاقس رأس الجدير...إحنا وين من الحركية الاقتصادية هاذي؟ قداه من واحد يجي و يخرج من القيروان كل نهار؟

الدولة كيف تعمل أوتوروت، أول حاجة تخمم فيها هي كيفاه ترجع حقو؟ و الترجيع هذا يصير عن طريق الاستخلاص و الاقتصاد في الطاقة. و هذا ما يصير كان كيف تبدا حركة كبيرة بين القيروان و النفيضة. و هذاكا علاه الدولة بجّلت توسيع الطريق السيارة بين تونس و الحمامات على القيروان ـ النفيضة. الكلها مسألة فلوس و مردودية.

بالعربي و بالفلاقي، باش الدولة تعطيك الفلوس يلزم عندها ضمانات مليون في المائة إلي هي باش ترجعلها و من المستحسن في أقرب الأوقات. هاذي هي الدولة كيفاش ولات تخمم في عصر الخوصصة، شئنا أم أبينا. و إذا كان نحبو ندبّرو حويجة يلزم مسؤولينا يبدلو عقلياتهم و يفهمو إلي رانا ماعادش في وقت بورقيبة و أحمد بن صالح و نويرة.

يتبع

_________________
Il n'y a point de rêves trop grands mais des esprits trop petits
Revenir en haut Aller en bas
Voir le profil de l'utilisateur
wadja79



Nombre de messages : 814
Age : 38
Localisation : La Marsa
Humeur : hamdoullah
Loisirs : Lecture, Sport
Date d'inscription : 02/09/2009

MessageSujet: Re: Autoroute, voie ferrée et technopole...Y a-t-il des solution   Jeu 11 Nov - 15:35


باهي يقول القائل كيفاه نقنعوا الدولة بجدوى الأوتوروت؟ يلزمنا نخلقوا في القيروان مشروع يخلي الناس تجينا. المشروع هذا كنت حكيت عليه من قبل و الدولة حاليا تنادي بيه و الرئيس توّة فوق العام و هو يحكي عليه و زيد حكى عليه في الخطاب الأخير : السياحة الثقافية.

السياحة الثقافية يرحمكم الله. صدقوني هذاكا الحل الوحيد حاليا إلي يتماشى مع إمكانيات الدولة و توجهاتها و خاصة إلي يتماشى مع إمكانيات القيروان و خصوصياتها: لا فيها لا شراب و لا ملاهي ليلة و لا والو.

ما نبداوش نحلمو، ربي يهديكم، بأقطاب تكنولوجية (على خاطر يلزم عندك قطب جامعي و نسيج صناعي قبل ما تحكي على قطب تكنولوجي و إحنا لا عنا لا الأولى و لا الثانية). و ما نحلموش بأقطاب صناعية على خاطر التجربة أثبتت الفشل الذريع متاعها في القيروان و على خاطر الدولة بيدها بدات تبعد على التوجه الصناعي إلي القيمة المضافة متاعو أقل بياسر من القطاع التكنولوجي و خاصة من قطاع الخدمات و خاصة السياحة الثقافية إلي عندها مردودية عالية و عالية جدا و هاذي راهي أمور مثبتة في دراسات علمية و موش من راسي.

يا سادتي المسؤولين، إنتوما كيف تعملو دراسة صحيحة على السياحة الثقافية في القيروان (موش الدراسة بودورو إلي صارت في مارس 2009)، كونو متأكدين إلي الدولة باش توافق طول و إلي التمويل يجيكم طول و إلي الأوتوروت و السكة الحديدية يبداو بالوقت عنا. على خاطر وقتها الدولة باش تربح مئات المليارات من العملة الصعبة من السياحة هاذي و باش ترتاح من البطالة في القيروان و باش تاخذ تمويلات هامة من البنك العالمي و البنك الأوروبي للاستثمار لتحقيق المشاريع متاع البنية التحتية و دون هذا الكل ماناش باش نأثرو على السياحة الشاطئية (على خاطر موش نفس النوعية متاع السياح) معناها ماناش باش نضرّو مناطق كيما سوسة أو الحمامات أو المنستير. و زيد هاذي سياحة تخدم العام الكل و موش مربوطة بالصيف معناها العملة الصعبة و الفلوس للدولة على امتداد 12 شهر. معناها منين تحسبها، تلقى القيروان رابحة و الدولة رابحة

هاذي حسب رأيي المتواضع الطريقة الصحيحة للعمل : تحطّ روحك في موضع صاحب القرار ـ تطلب حاجات مدروسة و تتلاءم مع سياسة الدولة ـ و تواكب عصرك و ما تبداش ضايع فيها.

_________________
Il n'y a point de rêves trop grands mais des esprits trop petits
Revenir en haut Aller en bas
Voir le profil de l'utilisateur
Amara

avatar

Masculin
Nombre de messages : 598
Age : 54
Localisation : Tunisie
Humeur : Travail
Loisirs : Parfois
Date d'inscription : 27/01/2006

MessageSujet: Re: Autoroute, voie ferrée et technopole...Y a-t-il des solution   Jeu 11 Nov - 19:38

Citation :
السبب الثاني: و هو الأهم. المردودية الضعيفة متاع المشروع هذا مقارنة بأوتوروت تونس الحمامات أو الحمامات صفاقس أو صفاقس رأس الجدير...إحنا وين من الحركية الاقتصادية هاذي؟ قداه من واحد يجي و يخرج من القيروان كل نهار؟
يا ودجا ما شاطركش الراي في ها الموضوع على خاطرلا للمقارنة وطريق باهي مخدوم على قاعدة راه يمثل شريا ن البلاد ويحرك اقتصادها ويجيب السياحة الثقافية الي تحكي عليها المهم نبدو في الانجاز الدراسات ولوجو على مناحي الفلوس
Revenir en haut Aller en bas
Voir le profil de l'utilisateur
wadja79



Nombre de messages : 814
Age : 38
Localisation : La Marsa
Humeur : hamdoullah
Loisirs : Lecture, Sport
Date d'inscription : 02/09/2009

MessageSujet: Re: Autoroute, voie ferrée et technopole...Y a-t-il des solution   Jeu 11 Nov - 20:45

Amara a écrit:
يا ودجا ما شاطركش الراي في ها الموضوع على خاطرلا للمقارنة وطريق باهي مخدوم على قاعدة راه يمثل شريا ن البلاد ويحرك اقتصادها ويجيب السياحة الثقافية الي تحكي عليها المهم نبدو في الانجاز الدراسات ولوجو على مناحي الفلوس

السلام عليكم،

خويا عمارة. هاذي هي المشكلة كيف نقولو لا للمقارنة. على خاطر الدولة تعمل المقارنة. لو كان جينا نحكيو على العدالة الاجتماعية و النهوض بالمناطق الداخلية وقتها كلامك صحيح مليون في المائة. و لكن موش هذا الوضع الموجود حاليا. هذاكا علاه قلت آخر مرة يلزمنا نبعدو على العواطف في تشخيص الأمور و نحاولو نحطّو رواحنا في مكان الناس إلي تاخذ في القرار. و نستسمحك خويا عمارة باش نعطي بسطة صغيرة على كيفية إنجاز المشاريع هاذي:

يلزمنا نعرفو قبل كل شيء إلي معظم التمويل يجينا من مصادر أجنبية و خاصة البنك الدولي و البنك الأوروبي للاستثمار في ما يخصّ مشاريع البنية التحتية. و الناس هذوما كيف يسلّفوا ما يهمّوش في العدالة الاجتماعية و المساواة بين المناطق و الجهات. يعرفوا حاجة بركة: سلفتك فلوس...رجّعهملي..و ما تبطاش زادة!!! هذا آش يصير في الواقع. معناها الناس هاذي ما تسلّف الفلوس إلا إذا كان المشروع مربح. و هذاكا علاه تلقى الرئيس في الخطاب متاعو ذكر مشاريع أخرى قبل الأوتوروت متاع القيروان، على خاطر عندها مردودية أكبر تخلي الدولة تنجّم تخلّص القروضات هاذي.

تنجم تقول وقتها: مالا شنوة الحل؟ نموتوش بالشرّ؟

الحل هو أنّ نخلقو مشروع للقيروان يخلّيها تجبد المستثمرين هذوما. و المشروع هذا يلزم فيه برشة شروط: يلزمو يكون ملائم لخصوصيات المدينة هذيكا ـ يلزمو يرجّع فلوسو في أقرب وقت ـ يلزم يخلق مواطن شغل بنسب عالية ـ و إذا كان في المستطاع، يلزم ما يكونش ملوث للبيئة.

هذوما الكل موجودين في مشروع السياحة الثقافية. و كيف نقول مشروع السياحة الثقافية، راهو داخل فيه الأوتوروت و "التران" و تحسين الطرقات في المعتمديات (على خاطر المشروع هذا يهم ولاية كاملة). بلغة أوضح خويا عمارة، كيف نجيو نتفاوضو مع الناس هذوما نولّيو نقولولهم راهو عنا مشروع سياحة ثقافية و من المتوقع باش يوصل عدد السياح إلى 500 ألف سائح في العام من ذوي الدخل المرتفع و نتوقعو إلي المداخيل في العام باش تكون في حدود ال150 مليار من مليماتنا و لكن راهو لازمنا تحسين البنية التحتية. و قتها خويا عمارة تاخذ الأوتوروت متاعك و "التران" و تتصلح الكياسات متاع مدينة القيروان و العلا و الوسلاتية و الشبيكة في ظرف قياسي (الكلها استثمارات أجنبية) على خاطر الناس إلي باش تعطيك الفلوس متأكدة إلي هي باش ترجعلها مثنّي و مثلّث.

و لكن كيف نمشيولهم و نقولولهم نحبّو على أوتوروت و نسكتوا، يقولولنا "حبّوا على رواحكم" و "ربّي ينوب" و "شدّ الصفّ لين يخلطلك الطريق". نعرف باش تقلّي هذا موش عدل و هذا ظلم (و عندك ألف حق) و لكن هذا الموجود حاليا و الذكي هو إلي يتأقلم مع الظروف و يحفظ مصلحة بلادو في نفس الوقت.

_________________
Il n'y a point de rêves trop grands mais des esprits trop petits
Revenir en haut Aller en bas
Voir le profil de l'utilisateur
Contenu sponsorisé




MessageSujet: Re: Autoroute, voie ferrée et technopole...Y a-t-il des solution   

Revenir en haut Aller en bas
 
Autoroute, voie ferrée et technopole...Y a-t-il des solution
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» Voie de la Navigation
» Prérequis pour la voie de la Médecine
» La voie du Martyre
» la decentralisation ,seule voie de developpement du pays.
» les prerequis pour la voie de la médecine

Permission de ce forum:Vous ne pouvez pas répondre aux sujets dans ce forum
Le forum de Kairouan :: KAIROUAN-
Sauter vers: